أنوع البن وطرق عمله

القهوة
بواسطة العضو : محمد مراد | بتاريخ : 5- أغسطس 2016
  1.  الاسبرسو مبيتحطش عليه سكر ، اشرب تركي اشرب امريكان , الاسبرسو متعملش عشان يتحط عليه سكر .
  2. آخر دراسة أتعملت أثبتت انه القهوه هوا أكثر مشروب أستهلاكا في العالم بعديه في المركز الثاني البيره .
  3. رغم انه القهوه اسم وأختراع عربي الا انه اول بن تجاري في العالم اكتشفه الهولندين كان في اندونسيا جزيره اسمها جافا , والبن ده يعتبر من أفضل وأجود انواع البن وليه خواص مختلفه عن اي نوع تاني ولسه بيتزرع ويتصنع ويعتبر من أغلى الأنواع , ولغة البرمجه java متسميه على اسم القهوه ديه لكن القهوه اكتشاف عربي يمني وفيه خلاف وناس بيقولوا اثيوبي.
  4. النسكافيه مش قهوه , النسكافيه زبالة القهوه , حرفيا النسكافيه بيتعمل من زبالة وبواقي صنف من القهوه اسمه روبستو , القهوه صنفين روبستو وارابيكا العالم كل بيشرب ارابيكا لأنه افضل بكثير وطعمه أحلى , الروبستو في نسبة كافيين أعلى بكثير بس ليه طعم مر ،وبيستخرجوا منه الكافيين بشكل طبي , لكن للأمانه بعض المتخصصين في أيطاليا بيعملوا انواع جيدة جدا من الروبستو بشكل معين يخلي الناس تحبه .
  5. بعيد عن كوبي لواك ( أغلى نوع بن في العالم من الفار البري ده ) أنواع القهوه بتتصنف عن طريق كذا حاجه , مصدر القهوه ديه , نسبة الكافيين في القهوه وهيا خضره , طعم ونكهة القهوه ( حلو , مر , ليموني , او بندقي) كذا وصف بيتوصف بيه الطعم  .
  6. القهوه مش كافيين , ابدا الناس كلها فاهمه ده غلط , القهوه مجموعة من الفيتامينات والمنشطات , يعني لو مسكنا فنجان الاسبرسو بيتكون من 3 اجزاء , الوش ( الأروما ) , جسم القهوه , وروح القهوه , الاروما ديه لوحدها كافيه انها تخلي نوع الكيلو ب100 ونوع الكيلو ب1000 .
  7. الكافين في القهوه بيفوقك في الشاي الاخضر بينيمك , والاثنين اسمهم كافيين , الفكره انه الكافيين ذات نفسه ليه كذا شكل كيميائي وكلهم اسمهم كافيين لكن الاختلافات البسيطه بتخلي تأثيره يختلف عشان كده اسعار وانواع القهوه بتختلف ,القهوه الغاليه بيبقى فيها نوع من الكافيين الخفيف بيفوقك بسرعه جدا وبيمنع الصداع , وبيبقى فيها تاورين اللي موجود في مشروبات الطاقه واللي بيديك حيويه , وبيبقى فيها مجموعة فيتامينات بتعوض النقص اللي في جسمك وبتعلى مؤشراتك الحيويه , القهوه ديه ماهما تقلت منها مش هتصدع .
  8. القهوه علاج طبيعي ضد الاكتئاب .
  9. انواع القهوه المتوسطة الجودة بتكتفي انها تديك كافيين بس وطعم معتدل .
  10. انواع القهوه الردئية بتديك نسبة كافيين قليله جدا وللأسف مش بتبقى متحمصه بشكل الصح اللي يشيل الاحماض المضره في القهوه واللي بتخلي طعمها وحش وبتسببلك صداع واسهال وخلافه  .

 

أنواع القهوة وطرق عملها :
الاسبرسو من أفضل ماأخترعه الأيطالين احسن من البيتزا حتى عباره عن بخار مايه بضغط 15 بار بيعدي مابين حبيبات القهوه يستخرج كل مافيه من خير في معيار 60 مل مايه ونسبة الكافيين فيها ثابته وموحده 100 مل جرام وممكن تترواح من 105 ل110 غير كده خارج المعيار وبتبقى قهوه وحشه ،الاسبرسو بضغط اقل من كده ميتشربش وبضغط اكثر بيتسمى ريسريتو وده بيبقى نفسه الاسبرسو بس تركيز اكثر ( يعني مايه اقل ) وده من أفضل الطرق لتجربة اي بن جديد ،الأروما في الاسبرسو ( اللي هوا الوش )( وش الاسبرسو اسمه كريمه , انا كان قصدي هنا انه الاورما في الاسبرسو بتجتمع اغلبها في الكريمه عكس الامريكان الاورما بتبقى في نص الكبايه) بتحتوي على كل الفيتامينات والكافيين الخفيف , الجسم بيبقى فيه حاجه اسمها زيت القهوه بجانب الكافيين طبعا ،روح القهوه في الاسبرسو وهما آخر شوية تحت بيحكولك كل حاجه عن البن , بيحكولك قصة حياته وقصة حياة اللي زرعه بيتكلموا معاك بيودعوك , روح القهوه ديه أشبه بالبنت اللي انت بتحبها , مرتبطين بقالكم سنين بس في الفتره ديه وصلت لنقطة انك فهمتها وحبتها بشكل مختلف فهمت كل حاجه فيها بقت هيا أوضح حاجه بالنسبالك , كذلك روح القهوه
القهوه التركي ونسبة الكافيين فيها المفترض 140 ملجرام , اتقل من الاسبرسو لأنه المفروض بتتعمل بأنواع غنيه بالكافيين النسبة ديه صعب اوي تحققها في مصر , والفنجان ده عامة مش اي حد يشربوا بجد لانه خطر , واقرب نوع انا شخصيا جربتوا قرب للنسبة ديه ( holiday blend كان ستاربكس منزلينه من فتره ) التركي مش منتشر في اوروبا لكنهم بدأوا يحبوا في المانيا هما اتقل حاجه عندهم هناك الاسبرسو ده الشبح بتاعهم , الاتراك دول شعب يتخاف منه بجد الامريكان كوفي , هيا في الحقيقه اوربيان كوفي محدش عارف بنسميها امريكان ليه والموضوع مجننهم في اوروبا  , ده معيارين اسبرسو بيتحط فوقيهم مايه سخنه (80 مئويا) ( محدش بيحط مايه مغليه على القهوه )

 

today’s brew , او قهوة اليوم وديه اللي هيا القهوه الامريكان فعلا بتتعمل بمكنة القهوه العاديه جدا اللي فيها فلتر وبيبقى ليها طحنه مختلفه عن الاسبرسو اسمها drip , لكن فيه ناس بتستمع طحنة الاسبرسو ملهاش معيار كافيين واضح .
coffee long , espresso long نفس الحاجه الفكره انه بيحط المايه الاول وبعدين يحط الاسبرسو فيهم, عكس الامريكان
اللاتيه , وده اختراع فرنسي , الفكره انه القهوه ثلثينها لبن وثلثها قهوه , وده يعتبر مشروب لبن اصلا تشربو قبل النوم , معيار اسبرسو عادي جدا ومايه وثلثين حليب عادي جدا .
الكابتشينو والفرابتشينو وبقية الاختراعات اللبنيه ديه نفسك الفكره الفرق نسبة القهوه للبن بتتغير .
الفرينش بريس , ديه آلة يدويه أخترعها الفرنسين ( بيصلحوا غلطة اللاتيه) , الفكره انه البن بيتكسر مش بيتطحن ( بيطحن خشن وكبير ) بكل بساطة بتحط مايه مغليه على البن ده وتستنى من 4 ل6 دقائق وبعدين تصفيه وبيبقى تمام لمدة 20 دقيقه وبيبوظ بعديها , الفكره انه الطريقه ديه اكثر طريقه تحافظ على طعم ونكهة وجسم القهوه وزيت القهوه بيبقى واضح جدا فيها ، الفرينش بريس حب ياجماعه , لو عايز تجربها لازم ترتبط الاول , الفرينش بريس بتقوي احساسك بالدنيا والعالم وبتدخلك في حالة عشق ورضا , ولو ليقت واحده بتشرب القهوه كده اتجوزها , على ضمانتي البنت ديه هتعشقك وتبسطك .
Dark Sumatra , ده مش من أفضل ولا أغلى انواع القهوه لكن نوعي المفضل , كان لازم اتكلم عنه بيعملوا ستاربكس وشركات تانيه ,ستاربكس بتعملوا بشكل معين بينزع منه الحموضه تماما , ( لو انت مدمن قهوه تركي متجبهوش لانك مش هتعرف توقف نفسك ) ( يفضل للقهوه التركي , او كأضافة للأمريكان ولا يفضل كفرنش بريس ويعتبر جيدا كاسبرسوا ) .

درجات القهوة 
 القهوه الأغمق ( البن ذات نفسه يحتوي على نسب كافيين عاليه) عامة نادره لكن بتتميز انه طعمها حلو ( sweet) وحجم الحبه ذات نفسها كبير والحموضه متوسطه او قليله بشكل عام , وديه أفضل أستخدام ليها هوا الاسبرسو والفرينش بريس والتركي بس مش اوي ومش حلوه اوي مع اللبن ( زي البلو ماونتن والجافا ).
القهوه الغامقه لكن أقل من اللي فاتت بتتميز انها في الاغلب اكبر حبه , ليها طعم ليموني مميز وحموضتها متوسطه , وديه افضل استخدام ليها التركي يليه الاسبرسو ومتنفعش ابدا في الفرينش بريس ولا مع اللبن ( زي الدارك سومطرا , والتربتيوت ( نوع رائع جدا كان عن ستاربكس زمان واتلغى ) ) .
القهوه اللي بتعوم مابين الغامق والمتوسط وديه بتتميز انها في تنوع عالي جدا في الطعم يعني ممكن يبقى طعم حلو ممكن يبقى حلو وليموني ممكن تبقى شبه الشوكلاته او تبقى شبه البندق في الطعم والحبه عامة بتبقى صغيره ( وده احسن بشكل عام ) , وديه افضل انواع يتحط عليها لبن وافضل انواع للفرينش بريس , وديه الخيار الافضل للي عايزين يجمعوا مابين التذوق والكافيين ( زي بايك بليس وهاوس ( انواع من ستاربكس )).
القهوه الوسط وديه اكثر انواع القهوه انتشارا واكثرهم تنوعا , هيا الأفضل عامة مع اللبن وفيه ناس بتحبها في القهوه التركي واي نوع او طعم من اللي فاتوا ممكن تلاقيه هنا , القهوه الوسط هنا ممكن يبقى نوع البن ذات نفسه غامق بس الفكره انها مش متحمصه قوي .

البن الفاتح وده مش عارف عملوا ليه ولا ايه لازمته ولا ليه حد يشربوا اصلا ربنا يهدي .

 
الناس اللي بتشرب قهوه :
– اولا احنا بناكل كثير ومبنتخنش ده اولا لانه القهوه بتقفل نفسك على الاكل اللي ملوش لازمه وتفتح نفسك على اللحوم , وخاصة اللحوم الحمرا  ثانيا القهوه بتحرق الدهون بشكل قوي جدا , آخيرا القهوه وده يعتبر من أضرارها بتنزل الاملاح اللي في الجسم , المضره والمفيده وبالتالي متقلقش وانت بتاكل املاح وبتعمل توازن غذائي للناس اللي عايش على البطاطس والبرجر والحاجات ديه
– احنا بنقدر الجوده مش الحجم , بنقدر الناس اللي بنصاحبهم وبنرتبط بيهم , بنختبر جودتهم ووفائهم , لو عندك صاحب مدمن قهوه قرب منه وصاحبه لانه عمره ماهيخونك وبيعرف يحكم على الناس ويفهمهم حلو اوي , حتى لو عمل نفسه عبيط اعرف انه عامل نفسه عبيط وفاهم كل حاجه
– اللي بيقدر القهوه بيقدر الحب , معرفش ايه العلاقه لكن القهوه بتقربك جدا لفهم معنى الحب , صعب تلاقي واحد مننا ارتبط بواحده لمجرد انها جميله او سهله , احنا بنختار بعنايه جدا وبنشوف حاجات في الناس محدش بيلاحظها لو صاحبك بيشرب قهوه ارتبطي بيه , نصيحه يعني  لانه هيبقى جنتل ورومانسي وهيقدرك ( الا لو كنتي تافهه القهوه بتخلينا منستحملش التفاهه ولا نستحمل الناس فهيولع فيكي )
– القهوه البارده ( التركي خاصة ) طعمها حلو جدا ويمكن ده الفارق الجوهري اللي يخليك تفرق مابين بن غالي وبن وحش انه طعم القهوه لما بتبرد بيبقى حلو جدا ده أشبه برضوا بعلاقتك بأي بنت , اي علاقه في أولها بتبقى زخم وحماس ومش بتشوف كل حاجه لكن البنت الحلوه هيا اللي بتفضل حلوه لما تبرد ( لما العلاقه تستمر لسنين حبك ليها مش بيتغير ) عشان كده ارتبطي بواحد بيشرب قهوه
– فيه انشطه كثيره جدا القهوه بتخليك تعملها احسن , زي الرياضيات والفيزيا وكده بس الافضل فعلا هوا البرمجه , مش متخيل مبرمج مش بيشرب قهوه , القهوه بتديك قوه رهيبه في كتابة الكود باقل bugs من اول مره واللي جرب عارف