من هو كارتيرون مدرب وادي دجله المرشح لتدريب الزمالك

كارتيرون
بواسطة العضو : Starx | بتاريخ : 21- أغسطس 2016

باتريس كارتيرون بدأ كباك رايت و لعب فى أندية كتير فى فرنسا أبرزها ليون و رين و سانت إتيان, و أكبر نقلة كانت لما راح ساوثهاومبتون اعارة ٦ شهور لعب فيها فى الدورى الانجليزى. فى نهاية كاريره, كارتيرون لعب فى نادى كان فى الدرجة التالتة فى فرنسا لحد ما إعتزل هناك فى ٢٠٠٧ و إتعين ككشاف فى النادى. بعد سنة, كان أقال المدير الفنى و عين كارتيرون مدير فنى لموسم ٢٠٠٨ و عمل موسم كويس جدا إحتل الفريق المركز الرابع بفرق ٤ نقط على الصعود للدرجة التانية (كان احتل المركز الـ ١٣ الموسم اللى قبله).
كارتيرون مشى من كان فى نهاية الموسم و إتعين مدير فنى لنادى ديخون فى الدرجة التانية و فى اول موسم مع الفريق إحتل المركز الـ ٩, بس على الرغم من كده الفريق كان تانى اقوى خط هجوم فى الدورى. فى الموسم التانى, صعد كارتيرون للدورى الممتاز بعد اما وصل للجولة الفاصلة و خلص كمركز تالت و تم إختياره كاحسن ٤ مدربيين فى الدورى. بعد موسم واحد فى الدورى الممتاز إنتهى بشكل كارثى, ديخون خلص فى المركز الـ ١٩ و هبط للدرجة التانية و كان أسوأ خط دفاع فى الدورى, و إنتهت بإقالة كرتيرون بعد اما جاله تهديدات بالقتل من جماهير الفريق (ايوة الموضوع مش بيحصل فى مصر بس يا يول).
فى صيف ٢٠١٢ كارتيرون مكنش عايز يرجع يدرب تانى فى الدرجة التانية و كان عايز يخوض تجربة جديدة فى إفريقيا فى بلد بتتكلم فرنساوى, إبتدى يجيله عروض كان قريب يمسك شبيبة القبائل فى الجزائر, لحد ما إتعين مدير فنى لمنتخب مالى عشان يمسكهم فى كاس امم ٢٠١٣. فى كاس أمم ٢٠١٣, كارتيرون صعد تانى فى مجموعة فيها غانا و الكونجو و النيجر و كسب جنوب إفريقيا ضربات جزاء فى ربع النهائى قبل ما يخسر من نيجيريا و يرجع يكسب غانا فى ماتش التالت و الرابع. بعد كاس الامم بكام شهر الاعلام صوره مع كاتومبى رئيس مازيمبى فى الكونجو على الرغم من انه كان لسه مدرب, و بعدها باسبوع قدم إستقالته و ساب الفريق فى نص التصفيات المؤهلة لكاس العالم ٢٠١٤ وسط غضب كبير من الاتحاد المالى اللى رفع عليه قضية فى الفيفا عشان كان فسخ من طرف واحد.
فى مازيمبى, كارتيرون كسب الدورى سنتنين ورا بعض (مش هتكلم عليها عشان مازيمبى زى باريس سان جيرمان فى الكونجو بينافس نفسه تقريبا) و وصل لنهائي الكونفدرالية ٢٠١٣ و خسرا قدام الصفاقسى ٣-٢, و فى الموسم اللى بعضه, وصل بالفريق لنص نهائى دورى ابطال افريقيا قبل ما يخسر من سطيف. الزمالك كان مع مازيمبى فى المجموعة و لو فاكرين ماتش مازيمبى فى القاهرة اللى خلص ٠-٠ و احمد على ضيع ضربة الجزاء و خرجتنا من البطولة. المهم مازيمبى عمل بطولة سيئة جدا على الرغم من صعوده أول المجموعة و خسر من الهلال بره و إتعادل معانا هنا, و فيتا كلاب (اللى كان معانا فى المجموعة بردو) عمل اداء أحسن بكتير و وصل النهائى. بعد أما خرج من بطولة إفريقيا, كارتيرون كان مهدد بالاقالة و الاعلام إبتدى يتكلم إنه مش هيكمل, خصوصا بعد كذا خسارة فى الدورى. رئيس النادى اتفاوض فعلا مع هيوبيرت فيلود (مدرب اتحاد الجزائر و اللى مسك مازيمبى حاليا) و كان عايز الفرقة يبقى فيها ٢ مدربيين عشان كارتيرون إبتدى يخبط جامد فى الدورى. عقد كارتيرون مع مازيمبى خلص فعلا فى إبريل ٢٠١٥ و و كان تجديده مشروط بصعود مازيمبى لدور المجموعات فى بطولة إفريقيا بعد ما تعادل مع ستاد مالى ٢-٢ فى الكونجو, و كسب ٢-١ فى مالى بصعوبة كبيرة و بعد الصعود العقد إتجدد لـ ٦ شهور بس و يخلص فى ديسمبر ٢٠١٥.
دورى أبطال إفريقيا ٢٠١٥ (انا بعتبرها أسهل بطولة إفريقية فى التاريخ) كان فيها فرق ملهاش اى خبرة أو تاريخ فى إفريقيا زى سموحة حبايبنا و المغرب التطوانى و مولودية الجزائر و مولودية علامة. مازيمبى لتانى السنة على التوالى قدم بطولة سيئة جدا على الرغم من سهولة مجموعته, أتعادل مع المغرب التطوانى و خسر و إتعادل مع الهلال و مكنش هيصعد من مجموعته لولا حبايبنا سموحة اللى خسروا من مازيمبى بره و جوا عشان يصعد مازيمبى بأعجوبة بعد اداء خارق من ساماتا اللى شال الفريق على كتفه. نص نهائى مع المريخ خسر فى السودان و كسب بسهولة فى الكونجو (كله عارف الاجواء عاملة ايه هناك) عشان يصعد و يقابل إتحاد الجزائر اللى صعد لاول مرة فى تاريخه و يكسبوا الماتشين بسهولة و يتوج ببطولة إفريقيا. رائى الشخصى ديه بطولة سماتا اللى من غيره مازيمبى مكنش عدى كل المراحل ديه.
كاس العالم للاندية كان كارثى , خسارة من فريق هيروشيما اليبانى ٣-٠ فى اول ماتش و بعدين خسارة كمان من كلاب اميركا المكسيكى تانى ماتش عشان يحتل الفريق المركز قبل الاخير فى البطولة بعد اوكلاند النيوزلاندى. عقد كارتيرون مع مازيمبى خلص فى نهاية دبيسمبر و قرر مازيمبى ميجددش العقد مع كارتيرون. كارتيرون مع كل الامكانيات المتاحة مع مازيمبى مقدمش ربع اللى قدمه لامين نداى اللى كسب بطولة افريقيا ٢٠١٠ و ٢ كاس سوبر افريقيى و مركز تانى فى كاس العالم للاندية.
نقطة مهمة:
راتب كارتيرون مع مازيمبى كان ٣٥ الف دولار فى الشهر. الافريقى التونسى كان عايز يجيب كارتيرون لما مشى من مازيمبى لكن الموضوع مكملش عشان كارتيرون كان طالب ٤٥ الف دولار فى الشهر و الافريقى كان مستغليها فمش مقتنع الصراحة بالـ ٩٠ الف دولار بتاعت وادى دجلة خالص و مش مقتنع اكتر أنه يطلب ١٠٠ دولار فى الشهر من الزمالك.

من صفحة المختلط 1911 على الفيس بوك